Rev 21 | GbrGAW | STEP | N navun magye, anyi woi woyi (n tna ala) n eshe woi-woyi, gama anyi nsaiye nya n duya.

Revelation of John 21

Anyi Woiwoyi Nshe Woiwoyi-i

1 N navun magye, anyi woi woyi (n tna ala) n eshe woi-woyi, gama anyi nsaiye nya n duya. 2 Omi Yohanna, magye, Ezhi Gyi-gyi-yi, Urushelima woi-woyi kwoi gmi n Shekwoyi aba n eshe kwoi shin zhi ɓe, nya bmiya-bmiya yi, ngye mula anyikwo n wo mula pa aba.

3 Ma wo begye yakwo, kwoi gmi n esu-shinkpegye kwoi gna, “Shi awye Shekwoyi puwa lo n kunsun n na azai nsayi, wa sase n kunsun nɓai ɓa zhin owo aza, E, Shekwoyi nwohin tukwo wa sase dna nɓa atasin. 4 Wa wunɓa awyenyi ya n na awyeba vinya, efi ta shan sun, kwo bugba wun, kwo ebwi cin, kwo nayi, san. Aɓeye vinya nla duya nyalonyalo.” 5 Oza nwo sase tu n esushinkpegye nyi wa gna, “Gyewye, mi zhin anya woi-woyi nu,” wa gnami nsai ge, “Ka aɓeye kpe, gama oɓo n mi gnaho nyi kwo zhin oɓo hin-hin nu n gaiciya yi.”

6 Aku zo zhin, Eminu zhin A n Z yi, Kmisunyi n Kmazoyi, mi ɓa ga oza n nuwan mikun wowo a nuwan kpeba, nuwan wye-wyeyi nya, cauta.

7 Ozaho-zahoi n wa gyi nasara, wo ɓa bwa anyi gye vinya gado, ma ze wo Shekwoyi wa ze mi oɓi. 8 Ama aɓiɓi n ɓa fa mi viɓo ɓai jeze n na avun yi, n na azayi nɓa ta nu egben, n na cegye dayi, azawuyi, n na aɓenukwoyi-zhinyi, n na aza yi n ɓa daɓo n alijanu yi, n na shangbayi, n na a kataceyi vinya, oɓa abwiba nyi n anapi ena zundna n kwo gyi ena n sulfa yi. Efi bayi nu.

9 Malaika gmanyi n na amalaika tnaba mi nɓa n ɓo ze a papa anyasan dnagmayi nya nyi, wa ɓe wa gna mi ge, “Gni ɓe n miyi ma wuho mula-nyikwo, kugya nyikwo.”

Ezhi Latu Nya

10 Wa la mi dna n ruya wa lomi yi n epe nshe, ma gye ezhi manayi-i, Urushelima gyi-gyi-yi kwoi gmi n na anyi bmana n Shekwoyi aba. 11 Kwo ɓei nunuyi n Shekwoyi mwa-mwa yi, kwoi bmiyana ngye luʼu-luʼu na bmiyayi n wu pyanyi n gye jasper. 12 Okwo a galu n mwakpa n mwapata n na abwokumiyi fi n gun awocei aba, a malaika ngun awocei-aba ɓai gu abwokunmi yi, n na a Israilai bye ngun awo-cei-aba aye yi kakpe n abwokunmi awocei-aba yi. 13 Abwokunmi fi n sepa dohodohoyi, n arewa abwokunmi ngun ata, n kudu abwokunmi ngun ata n yamma, abowkunmi ngun ata, n gabas abwokunmi ngun ata. 14 A galu yi n na agoro yi awocei-aba n na bara kugya nya aye yi kakpe n kwo agoro awo-cei-aba yi.

15 Malaikayi n Zinariya busi nyamwinyai shi n wo akun, wa mwi ezhi yi n kwa abwokunmiyi n kwa agaluyi. 16 Shi wo ɓei mwi kwo wa gye kwo n na abwakwonu yi ngun anyi n mwi awye. Ekpa n pata yi sun dei-dei mile dubu gmanyi ncei kpe tagyi ngun atnun. (1,500) 17 N navun wa mwi galu shin-shin wa gye kwo apita tagyi ngun aba ncei-kpe awocei tnanyi (216). N zunduya Malaika yi wa wumi mwi-mwi yi aye n nyamwi ye hin-hinyi. 18 – 19 – 20 ^{▼▼The text of verses 18-Rev 21:20 has been merged.} Ezhi n kwohin tukwo, nwu serai n gyi-gyi-yi zinariya nabmiya yi ngye maganyi. A zhin kwo agalu n jaspa yi nu, amikwo kpe n agoro awo-ceiaba n na akuta a nakwoyi – luʼu-luʼu yi

goro kmisunyi n jaspa yi
bayi n Sapphire yi
tayi n chalcedonyi yi
nyiyi n emaraod yi
tunyi n Sardonyi yi
tnanyi yi n Sardus yi
tnaba yi n Crysolite yi
nyimwa-nyimwa yi n beryl yi
ciwa-gmanyi yi n topaz yi
nwo yi n Chrysoprase yi
awocei-gmanyi yi n jecinth yi
awo-cei-aba yi n amethyst yi.
21 A zhin abwokunmi awo cei aba yi n luʼu-luʼu yi nu, luʼu-luʼu dohodohoi n kwo bwai. Okwo azokwo n gyi-gyi-yi zinariya na bmiya yi, n gye maganyi.

22 Aduwa-nyakun to ɓei nyi n ezhi yin gama Dagayi Shekwoyi ikoda n Kugya yi a ga ɓa nu mwa-mwa n na aba vinya. 23 Ezhiyi to n nyipyei ɓeyi pman kwo epyan, ɓa gakwo buzagnan, gama Shekwoyi n kugya mwa-mwai nu gakwo buzangna. 24 Okwo buzangna ɓei ga abye buzangna n anyi, abegyi yi n anyi vinya ɓei ɓe nɓa mwa-mwayi n kwo. 25 Ata gu okwo abagu-nyan, ɓaguya zhi nylo-nyalo, sukwo to lon ɓom. 26 Aɓei ɓe n abye-mwa-mwai n ɓa latuyi n kwo mi. 27 Ato ɓei ye n nyaho-nyahoi n kwo zhin nukwoyi nɓon, ɓenukwoyi-zhinyi kwo tnagaiciya da to ɓei lo ɓon sai aza nɓa aye kafi n Kugya Litafi wye-wyeyi nya.